Xilligii xukuumadii Maxamed Siyaad Barre ayaa waxaa Somalia ka abuurmay koox sharciga ka saraysa, koox waxay doonto samaysa, koox hantida shacabka iyo midda qarankaba siday doonto ka yeesha. Kooxdani inkastoo ay u badnayd beesha uu Madaxweynihii xiligaasi ka dhashay, hadana waxaa la dhihi karaa waxay guud ahaan isugu jirtay kooxdii awoodda dalka waqtigaas haysatay iyo dadkii ku xirnaa. Waqigii xukuumadii maxamed Siyaad ayaa waxaa Somalia caadi ka ahayd in shacabka xoolahooda, beerahooda iyo qaasatan gawaarida dibadaha laga keensado ay si sharci darro ah ula wareegaan una bililiqaystaan taageerayaashii xukuumaddii waqtigaas jirtay.

 Ma doonayo inaan ku dheeraado dhacdooyinkii Bililiqada ahaa ee ay madaxdii iyo xukuumadii Maxamed Siyaad caanka ku ahayd, waxaanse jecelnahay inaan shacabka xasuuninno meeshii ay raggii Bililiqadaas masuulka ka ahaa ku danbeeyeen iyo sidii Ilaahay u amaal mariyey. Waxaana lagu soo koobi karaa in ay raggii Soomalia 21ka sano waxay doonaan ka samaynayey ku danbeeyeen qaxooti iyo cayr iyadoo maalkoodii iyo noloshoodiiba bililiqo iyo qaxooti ku danbaysay, halkaan waxaa qofkii waxgaranaya sidii Ilaahay raggaas u amaal mariyey ugu sugan AAYAAD lagu cimri qaadan karo.

 Dhacdada midda kor ku xusan ku xigtay ee indhaha shacaka Soomaaliyeed soo jiidatay waxay ahayd sidii Ilaahay amaal kooda u mariyey dagaal oogeyaashii reer Muqdishu ee ku bahoobay xisbigiii Sharta iyo Shaydhaanka ee Ashaado la dirirka. Xubnihii ururkaan ku bahoobay waxay ahaayeen xubno ama rag ku naaxay Bililiqada hantida shacabka iyo isbaaraysiga shacabaka Soomaaliyeed ee masaakiinta ah, iyagana waxaa Ilaahay mariyey amaalkoodii iyadoo Allaha Caadilka ahi ku saladay Golihii Maxaakiimta Soomaaliyeed iyo shacabkii ay 16ka sano dhiigooda dhuuqayeen. Raggaani waxay maantay ku sugan yihiin iyo kibirkii iyo dhacii ay shacabka u gaysan jireen iyadana waxaa ku SUGAN AYAAD loo baahanyahay in laga tusaale qaato waxaana muuqata in ay meel cidlo ah maantay ka taagan yihiin maalkii iyo magacii ay Bililiqaysteen.

 Hase yeeshee arrinta ugu weyn ee igu dhalisay inaan arintan wax ka qoraa waxay ahayd ama tahay kadib markii aan maqalnay in gurigii CISMAAN CAATO la Bililiqaytay, markii shacabka Soomaaliyeed idaacadaha ka dhagaysteen in xooggaga ina Yeey, Cali Geedi iyo Ethiopia Bililiqeeyeen guriga Cismaan Cali Caato, isaga qudhiisuna uu idaacadaha ka hadlay sheegayna in gurigiisa laga bililiqaystay lacag iyo hanti kale oo badan. Waxaa kaloo Internetyada la soo galiyey sawirro caddaynaya burburka iyo bililiqada loo gaystay guriga Cismaan caato.

 Nin Jaahil ah ayaa laga sheegay Ilaahay inuu xaq soore yahay waan ogaa laakiin inuu Dabo, Dabo ku gudayo u malayn mayn. Waxaa xaqiiq ah in Bililiqada loo gaystay guriga Cismaan Caato ay ku sugan yihiin AYAAD iyo arimo qofkii waxgaranayaa ku cimri qaadan karo iyo in dhacdadani la mid tahay kuwii iyada ka horeeyey ee aan kor ku soo xusnay. Koleey annagoo aan cidna magacaabayn waad garan kartaan dhibaatooyinkii shacabka Soomaaliyeed loo gaystay iyo meeshii ay ku danbeeyeen raggii dhibaatooyinkaas ka danbeeyey.

 Waxaad moodaa in dhibaatooyinka iyo burburka Soomaalia ku habsaday aanay ahayn wax iska dhacaya balse ay yihiin kuwo aad mararka qaarkood ka dhex arkayso in ay jirridaha u siibayaan koox xadgudubtay inkastoo ay shacabka aan waxba galabsan dhibaatadu mar walba u badantahay, hadana Ilaahay waa caadil wuxuuna shacabka Soomaaliyeed tusiyey arimo badan oo ay ku cimri qaadan karaan.

 Waxaana ka mid ah in Ilaahay shacabka soomaaliyeed ku guuleeyey xukunkii Golihii Maxaakiimta oo ay wali ka samri la yihiin wanaagii iyo kala danbayntii Ilaahay raggii hogaaminayey shacabka soomaaliyeed ugu soo dhiibay, hase yeeshee laga ceshaday kadib markii ay Allaah uga mahad naqi waayeen dhibaatada uu ka fayday, diintoodana difaacan waayeen. Arintaan qudheeda waxaa laga yaabaa in Ilaahay shacabka Muslimiinta ah ku imtixaamayo sida qolooyinka qoraalkani ka hadlayo ee xadgudbayba loo imtixaamay.

Qoraalkeenna waxaan ku soo gunaanadaynaa madaxda Kooxda Embagathi ma ku waano qaadan doonaan sida Ilaahay u amaal mariyey kooxihii ka horeeyey ee shacabka Soomaaliyeed dhibaatada iyo bur burka baday, mase waxay noqon doonaan kuwo ka indha,la xaqa oo iyagana aan Ilaahay Aaqiro kaliya la sugin ee adduunka lagu amaal mariyo?

 Jawaabta Ilaahay ayaa garanaya waxaase waqtigaan shacabka Soomaaliyeed ku sugan yihiin xaaladii ugu adkayd ee ay taariikhdooda soo maraan. Waxaaban markaan ka baqaynaa in Ilaahay nagu soo dedejiyo cinqaab ka wayn kuwii aan horay u soo aragnay, waayo dunuubta iyo xadgudubyada kooxdan hadda dalka haysataa waa kuwo aan horay shacabkeennu u arag, koleeyse naxariista Ilaahay lagama quusto.

 Shacabka Soomaaliyeed waa inay dib u jaleecaan dhacdooyinkii iyo Aayaadkii Ilaahay tusay ilaa iyo waqtigii ay xornimada qaateen iyo meeshii ay ku danbeeyeen kooxihii masuulka ka ahaa dhacdooyinkaas. Waa in aan shacab ahaan ogaanaa in Ilaahay waajibaad na saaray haddii aan ka soo baxnana uu noo gargaarayo iyo in Ilaahay kooxda Imbagathi amaalkooda marinayo sidii uu kooxihii ka horeeyeyba u mariyey. Qof walba iyo degaan walba waajibka Ilaahay saaray ayaa laga doonayaa inay gutaan iyagoo aan cid kale ku halayn go’aanka kama danbaysta ahna Allaah u daynayaan.